SELANGAU: Projek pemansang ti dipejalaika Ejensi Pemansang Wilayah Rajang Tengah (MIRRDA) iya nya enggau tuju ngenegapka ekonomi sereta ngemanahka infrastruktur pemun di kandang menua pesisir, kelebih agi di kandang menua Selangau enggau Kanowit.
Kaban Kunsil Nengeri (ADUN) Tamin Ir Christopher Gira Sambang madahka, perintah Sarawak udah ngagihka RM1.5 bilion ngagai MIRRDA dikena nentuka projek pemansang besai ulih dipejalaika, enggu mekuh ngagai perengkaguna infrastruktur, jalai alun enggau ngenegapka sektor betanam betupi.
“Semua projek tu dipejalaika setipak enggau polisi perintah besai enggau perintah nengeri ti bebendar ngenegapka kandang menua pesisir enggau pemansang ti sebela,” ku iya nengah penerang ti dianjung ba laman rama bekaul enggau Program Jiwa Komuniti Madani Renggat DUN Tamin ti diatur Opis Pemadah Malaysia di Rumah Lenggang Takin, Nanga Tajam ditu kena Hari Minggu nyin tadi.
Program tu udah dipenyadika Sekretari Politik ngagai Premier Sarawak Susan Clement Ingun ti ngarika iya.
Gira mega ngemeratka guna projek infrastruktur baka jalai alun dikena ngangkatka aksesibiliti enggau perengkaguna ngagai peranak di kandang menua pesisir.
Nyadika chunto, ku iya, projek Jalai Pan Borneo kediatu mega udah nyapai 98.4 peratus tembu di Sarawak, dibandingka enggau 77 peratus di Sabah ungkup Fasa 1A lalu Fasa 1B diatu benung dalam proses ngaga.
Kelimpah ari tu, ku iya, Sarawak mega udah berengkah enggau projek jalai alternatif di DUN Tamin, Selangau dikena nyambung peranak enggau muntang agi lalu ngangkatka tikas pengelantang idup sida.
Gira mega udah madahka bekaul enggau pengeransing perintah Sarawak dalam nyendiaka peluang pelajar ti besai agi ungkup rebak nembiak, kelebih agi dikandang menua pesisir.
Iya madah, perintah Sarawak udah meri peluang ngagai nembiak dikena nampung pelajar enggau enda bebayar di universiti nengeri, enggau juluk deka nyapai tu datai ba taun 2026.
“Aku selalu meri pemerat ngagai pelajar laban nengah tu, sebuah ruang bilik deka ulih ngubah pengidup sida nyadi manah agi. Pelajar iya nya kunchi ngagai peluang. Tu mega tikit pansut ari penyeranta,” ku iya.
Beserimbai enggau tu, Susan mega udah madahka agih belanja geran sepenyampau RM10,000 ari Gira ungkup Tabung Pemansang JKKK Rumah Lenggang.
“Ngarapka agih belanja tu ulih mantu dalam pengeransing ngatur enggau pemanang di rumah panjai tu,” ku iya.
Iya mega udah madahka pengaga ati ngagai peranak Rumah Lenggang, Opis Pemadah enggau ejensi ti bekaul laban udah ngemujurka program tu.
Dulu ari tu dalam jaku Pemesai Pemadah Pelilih Menua Sibu Zaini Morshidi madah, batang tuju Program Jiwa Komuniti Madani tu iya nya dikena ngemeranka pengeransing beserakup enggau pengelantang dalam rayat, kelimpah mai penerang, polisi enggau inisiatif perintah, kelimpah megai pangku pengawa dalam meri penerang perintah ke renggat baruh.
Kelimpah nyadi medium ti nyambung entara perintah enggau komuniti di renggat baruh, ku iya nerang agi, program tu mega iya nya pengawa ti meruan dalam ngemeranka pemanah ulah enggau talukka menua entara rayat.
“Nyadika rikod ungkup semua, kelimpah meri akses ngagai penerang ti ti beguna, program tu mega mekuh ngagai isu berat baka nyeliahka penyalah gian dadah kelebih agi ngagai raban nembiak.
“Isu tu beguna ngambika sama kitai meretika dalam pengeransing kitai ngemansangka komuniti di kandang menua tu dalam jeman sains enggau digital tu. Kitai dekaka peranak di kandang menua pesisir ulih ngasaika pemansang ti setipak enggau ubah jeman,” ku iya nambah.